Пратениците од ВМРО-ДПМНЕ ќе поднесат Интерпелација за работата на министерот за земјоделство, шумарство и водостопанство Љупчо Николовски до Собранието на Република Македонија поради пожарите и проблемите на земјоделците.
– Во Република Македонија на целата нејзина територија се случуваат серија отворени пожари, односно опожарување на огромни површини високостеблеста формирана шума со непроценливи последици од трајна загуба и деградирање на шумскиот појас, сериозни еколошки последици врз животната средина, уништување на приватната и јавната сопственост и доведување во животна опасност на жителите на опожарените региони и населени места, рече на прес-конференција пратеникот Зоран Илиоски додавајќи дека секој ден има нови пожари надвор од контрола, а од институциите нема помош.
Тие заклучиле дека шумските пожари се намерно предизвикани од актуелната власт со цел да се сврти вниманието на граѓаните на Република Македонија од, како што рече Илиоски, погубните политики кои ги спроведува актуелната Влада во десегашниот период. Сметаат дека најодговорен за грижата и заштитата на шумите е министерот Љупчо Николовски кој, според нив, покажал несериозност во пристапот за решавање на проблемот.
– Николовски дозволи состојбата да ескалира во граници кога е мошне тешко да се контролира и истовремено штетите достигнаа до алармантно ниво… Апсурдното однесување на министерот Николовски е до таа мера што му требаа 15 дена од појавата на пожарите на отворен простор и серијата од над 30 тековни активни пожари за конечно да ја преиспита и да предложи преиначување на Одлуката за ограничено, односно делумно во целосна забрана на движење во шумите, рече Илиоски.
Интерпелацијата ја поднесуваат и затоа што сметаат дека Николовски ги игнорира земјоделците и не успеал да се справи со проблемот со откупот на земјоделските производи.
– Земјоделство претставува една од најбитните гранки во македонското општество и токму затоа ова министерство не смее да го води еден несериозен, некомпетентен и неискусен политичар, додаде Илиоски.