Премиерот Христијан Мицкоски денеска изјави дека од почетокот на примената на системот „Безбеден град“ засега нема поплаки од граѓани и дека Владата е во постојана координација со Министерството за внатрешни работи.
Тој појасни дека на стартот е зголемен прагот на толеранција за детектирање на прекршоците за брзо возење, со цел граѓаните постепено да се прилагодат на новиот систем. Во моментов, како што рече, толеранцијата изнесува околу 15 отсто, што е над европскиот стандард од 10 отсто, но со текот на времето ќе се врати на европските критериуми.
„До 50 километри на час толеранцијата е шест километри, над 50 е девет километри, а над 90 е 12 километри на час. Ова е направено за граѓаните да не се казнуваат веднаш, но со навикнувањето на возачите ќе се вратиме на европските стандарди“, изјави Мицкоски.
Премиерот нагласи дека целта на системот не е казнување, туку намалување на сообраќајните несреќи и заштита на човечките животи, додавајќи дека очекува значително намалување на бројот на прекршоци и изречени казни.
Од денеска, 1 февруари, системот „Безбеден град“ почна да функционира во Скопје, Куманово и Тетово, како и на коридорите 8 и 10. Преку камерите ќе се детектираат четири типа сообраќајни прекршоци: непрописно паркирање, пречекорување на дозволената брзина, минување на црвено светло и управување возило со истечена сообраќајна дозвола.