Пожарот што утрово околу 9 часот зафати семејна куќа во строгиот центар на Струга, избувнал во работилница за ролетни сместена во приземјето на објектот, соопшти Секторот за внатрешни работи од Охрид.
Командирот на територијалната противпожарна единица во Струга Урим Каба вели дека пожарот бил пријавен во девет часот и три минути по што веднаш се интервенирало и била спречена поголема несреќа.
– Веднаш по пријавата две противпожарни екипи со седум пожарникари се упатија на лице место за да го изгаснат пожарот. Кога стигнавме, објектот беше во пламен, а имаше и граѓани кои сакаа да помогнат, но се повлекоа за да можеме да интервенираме. Започнавме со гаснење на пожарот и извлекување на луѓето од внатрешноста, но поради густиот чад, не успевме да видиме дека има уште еден човек кој беше целосно затруен со јаглероден диоксид. Викнавме итна медицинска помош, а во меѓувреме и ние му укажавме прва помош, изјави Каба.
Затруениот стружанец З.Г. е згрижен на хируршкото одделение во градската болница и се следи неговата состојба. Според послените информации од дежурниот хирург доктор Владо Кочоски, кој го примил на одделението, тој е во стабилна состојба.
– Пациентот е во стабилна состојба и е свесен, но се уште прима терапија. Бидејќи се работи за труење со чад и вдишување на пластични материи добива и кислород, рече Кочоски.
Увидот се уште трае, но според командирот Каба, огнот се појавил во работилницата и ги зафатил пластичните материјали, а потоа се проширил и на останатиот дел од куќата.
– Доколку не интервениравме навреме, ќе имаше огромна материјална штета. Имаше тенденција за проширување на пожарот на останатите куќи кои се залепени до опожарената, но со брзата реакција на пожарникарите, успеавме навреме да спречиме поголема трагедија, објаснува Каба.