Високите температури, а особено ветерот прават големи проблеми во обидите да се стави под контрола пожарот што веќе втор ден гори на потегот меѓу беровските села Будинарци и Митрашинци.
Со пожарот се борат околу 100 луѓе, пожарникари од Берово, но и од Виница, Кочани, Радовиш, Струмица и од други градови, како и специјални тимови на Дирекцијата за заштита и спасување, на Центарот за управување со кризи, полиција, гранична полиција и вработени во „Македонски шуми“.
Во текот на денот во гаснењето на пожарот беше активиран и хеликоптер на МВР. Бил вклучен и авионот „Ер Трактор“ на Дирекцијата за заштита и спасување. Според информациите некаде до пладне пожарот беше стивнат, но потоа од 12 до 16 часот повторно се разгоре.
Попладнево пожар имаше и кај месноста Скараница, Виничко. Центарот за управување со кризи информираше пожарот бил изгасен за неколку часа од пожарникарите од Виница и локалното население. Во пожарот изгореа 10 до 15 хектари мешана шума и трева, како и еден овоштарник со сливи.
Според првичните проценки од Национални шуми досега со пожар беа зафатени околу 60 хектари дабова шума.