До 13 часот во земјава биле регистрирани вкупно 11 пожари на отворен простор, од кои шест сè уште се активни, еден е ставен под контрола, а четири се целосно изгаснати, информираат од Центарот за управување со кризи.
Активни пожари се евидентирани на територијата на општините Студеничани, Зелениково, Гостивар, Чашка, Пробиштип, Градско и Кичево. Пожарот кај Тајмиште во општина Кичево е ставен под контрола, додека пожарите во Сарај, Гостивар, Куманово и Берово се изгаснати.
ЦУК соопшти дека состојбата на терен постојано се следи.
Во меѓувреме, директорот на Дирекцијата за заштита и спасување, Стојанче Ангелов, информираше дека пожарот меѓу селата Горно Чичино и Долно Чичино се проширил и во моментов е надвор од контрола.
Според Ангелов, огнот зафатил голема површина со сува трева и се движи кон сртот, што дополнително ја отежнува интервенцијата на екипите на терен.
Пожарникарите во моментов се обидуваат да го запрат ширењето на огнот и да ги заштитат овоштарниците и околните објекти.
– За жал, ја изгубивме контролата над пожарот. Станува збор за голема површина со сува трева. Пожарот се движи кон сртот, а пожарникарите вложуваат максимални напори да го задржат и да ги заштитат овоштарниците и објектите во околината. Ова ќе биде долга и тешка битка, можеби ќе трае и неколку дена – изјави Ангелов.
За справување со пожарот веднаш била побарана дополнителна помош. На терен се ангажирани државни трактори, хеликоптер на МВР, како и четири специјализирани противпожарни возила „Пинцгауер“.
Надлежните служби продолжуваат со напорите за локализирање на пожарот и спречување на неговото понатамошно ширење.