Пожарникари од скопската противпожарна бригада извлекуваат луѓе од запален стан во зграда во Ново Лисиче во Скопје. Командантот на противпожарната бригада, Владимир Симоновски, за „А1он“ кусо изјави дека додека на една страна се гаси пожарот, од соседната соба се извлекува станарка.
„Во соба веднаш до онаа каде што избил пожарот има жена којашто оди на дијализа. Сега ја извлекуваме“, рече командантот Симоновски.
Очевидци велат дека пожаникарите извлекле и жена заглавена во лифтот откако избил пожарот.
Запалениот стан е на булеварот АСНОМ број 64 во Ново Лисиче. Станарите велат дека причина за пожарот била плинска боца.
Командантот Симоновски најави изјава за пожарот откако ќе заврши извлекувањето на луѓето и откако ќе биде изгаснат огнот.