Сите балкански земји, освен Македонија, може да очекуваат поволни вести од препораката на Европската комисија за понатамошно проширување на Европската Унија.
Белградското радио Б-92, пренесува извештај на виенскиот економски весник „Виртшафтсблат“, во кој е наведено дека за Албанија ќе биде препорачано да добие статус на кандидат за членство во Европската Унија, Црна Гора ќе може да го отвори главното поглавје од пристапниот договор, Србија ќе ги продолжи пристапните преговори најдоцна до јануари, а Косово ќе го направи првиот чекор кон ЕУ со почетокот на преговорите за Спогодбата за стабилизација и придружување.
Виенскиот весник оценува дека единствено процесот на приближување на Македонија кон ЕУ се одвива „тажно“, главно поради блокадата од Грција во врска со името. Брисел, исто така, оценил дека политичката ситуација во Скопје е полоша во споредба со минатата година, главно поради владината криза.