Пост-изборна мисија на Парламнетарното собрание на Советот на Европа (ПССЕ) ќе ја посети Македонија на 10 јули.
Како што пишува МИА, Штефан Шенах, известувач на Ад-хок комисијата на ПССЕ, која ги следеше претседателските и парламентарните избори во Македонија претставувајќи ја изборната мисија оцени дека изборите биле добро организирани, а резултатите коректни и покрај констатираните пропусти за време на предизборната кампања.
Шенах посебно изрази загриженост за состојбата во меѓуетничките односи во земјата, за што предизборната мисија на ПССЕ при својот престој во Македонија испрати повик „да не се продлабочува јазот меѓу етничките заедници.“
– За жал, јазот се прошири. Ние повикавме да нема говор на омраза. Но, тој беше присутен – истакна меѓу другото Шенах.
За ПССЕ е необично присуството на 1,8 милиони гласачи во земја која брои нешто повеќе од 2,1 милиони жители. Тој побара преиспитување на гласачките листи и парцијален попис, бидејќи според него е важно да се има доверба во изборниот процес.