Портпаролот на Српската православна црква епископот бачки Иринеј денеска демантира дека на прославата на 1700 години од Миланскиот едикт во Ниш, Македонската православна црква била директно спомната и квалификувана како нехристијанска и парацрковна организација.
Епископот Иринеј на заедничката прес-конференција во Белград со митрополитот на Вселенската патријаршија Емауил негира и дека при преводот го фалсификувал говорот на вселенскиот патријарх Вартоломеј и додавал квалификации на сметка а МПЦ.
– Вселенскиот патријарх зборуваше дека во нашето православно црковно подрачје се појавуваат расколи, кој се препознава во тоа е негова работа, но воопшто не е кажано дека се нехристијани или слично. Ние сите, почнувајќи од вселенскиот патријарх гаиме искрена и братска љубов кон сите, вклучувајќи ги и нив, бидејќи тие се наши браќа и сестри и се трудиме таа рана да ја залечиме што побрзо, рече Иринеј. Тоа, според него, не е можно „на пучистички начин, туку само на евангелски и канонски средства“.
Митрополитот Емауил, пак, го прочита делот од говорот на вселенскиот патријарх Вартоломеј од прославата во кој се наведува дека „архиепископот Јован се прогонува бидејќи го почитува канонскиот поредок и ја признава својата духовна припадност кон СПЦ“. Емауил рече дека се надева оти браќата (МПЦ) ќе ја прифатат оваа порака на Вартоломеј.