Поранешниот градоначалник на општина Штип, Илчо Захариев денеска го напушти градоначалничкиот кабинет, а во соопштението до јавноста вели во изминатите четири години му било чест со неговиот работен ангажман и посветеност барем малку да го подобри животот на граѓаните во нивните населби и села.
– Тоа што го ветив на почетокот на мандатот, целосно го исполнив и Штип повеќе не истиот град што го затекнав во 2013 година. Верувам дека не ве разочарав, а тоа што е сработено во градот останува за идните генерации. Општина Штип ја оставам целосно консолидирана, без долгови, и сите проекти кои се завршени се платени се вели во писменото соопштение на Захариев.
Тој забележува дека во овој момент на сметката на општина Штип има 4.350.000 денари. Општина има побарувања по основ на комуналии од околу 69 милиона денари или околу 1.119.000 евра, додека тековните обврски на општината изнесуваат околу 6,6 милиони денари.