Директорот на Агенцијата за вработување, Влатко Поповски денеска во Штип оствари средби со невработени лица и со сопственици на неколку фирми.
Поповски на невработените лица им соопштил оти Агенцијата за вработување од ноември почнува со нов проект односно официјално пуштање на првиот џоб маркет – портал во Република Македонија.
– Тоа е изработка на апликации, на што работи Министерството за труд и социјална политика во соработка со факултетот ФИНКИ, а е за добивање информации за слободни работни места. Така да во наредниот период ќе има доста активности, вели Поповски.
Според него, податоците на Државниот завод за статистика за намалување на бројот на невработените во земјава за над 2 проценти, значи дека македонската економија полека го чувствува позитивниот тренд на економијата во ЕУ, а исто така големо влијание имаат и мерките кои ги има Владата за намалување на невработеноста.
Поповски најави дека од наредната година Центарот за вработување во Штип ќе се сели во централното градско подрачје, со што новиот простор ќе биде попристапен за граѓаните.