Претседателката на ДОМ, Лилјана Поповска смета дека ултиматумот од „борците против загадувањето од Железарница“ е обид за партиска војна.
Таа за А1он изјави дека како партија која е дел од владината коалиција направиле многу, посочувајќи го како пример стопирањето на рестартирањето на велешката топилница, и затоа смета дека институционалното делување е делотворно.
„ Ако некој сака да прави партиска војна тоа е негов избор, мислам дека секој граѓанин кој сака да го запре загадувањето од Железарница го сака секој човек за соборец“, изјави Поповска.
Поповска објасни дека во договорот за коалиција во новата влада, поставиле пет барања меѓу кои и стопирање на загадувањето од скопската железарница.
На иницијативата на граѓаните од Железара им порача дека соборци има и во опозицијата и во власта, а ДОМ ќе остане во коалицијата за да ги реализира зацртаните договори.
Поповска не сакаше да го коментира дополнително ултиматумот. За пораката дека доколку за 48 часа не издејствува гасење на оџаците, нејзината партија тогаш не е добродојдена на протестите одговори кусо дека овој проблем нема место во политиката.