Претседателката на ДОМ, Лилјана Поповска смета дека нејзината изјава во врска со немилите настани во Собранието во одредени медиуми била злоупотребена и извадена од контекст.
– Во мојата изјава јас повикав на разум, одговорност и почитување на институциите, зашто Македонија е наш заеднички дом, кој треба да го зачуваме. Изразив жалење првин за присилните мерки кон новинарите и пратениците, па за нападот кон Претседателот на Собранието и за задните намери на организаторите на протестите. Ние сме пратеници избрани да ги штитиме граѓаните и уставниот поредок, затоа во никој случај не можам да оправдам насилно рушење на институциите. Затоа го кажав и ова: Никој нема право да ја урива државата, ни маж, ни жена, рече Попоска на денешната прес-конференција.
Таа додаде дека кога некој ја прозива треба да објасни со кој дел од нејзината изјава и со кој збор не се согласува.
– И нека не ме употребува за да фрла прашина в очи, со цел да се дефокусира дебатата од суштинските прашања! Во зовриената политичка ситуација имавме ем насилство, ем обид за уривање на државата. Јас се борам и ќе се борам против двете, како и досега! Секогаш сум се водела од принципите за општо добро, правичност и интерес на Македонија, истакна Попоска.
Таа изрази жалење, како што рече, за сите добри луѓе во земјава кои се во овие моменти злоупотребени и изманипулирани на разни начини.
– Вистината ќе измие се. Вистината мора да се каже, независно дали некому му се допаѓа, и независно од цената што за тоа треба да се плати! Сигурна сум дека се ќе излезе на виделина и ќе се разјасни, за да не ни се повтори никогаш веќе, рече Поповска.
Таа додаде дека верува во македонското општество, бидејќи, како што истакна, тоа имало капацитет да се справи со воен конфликт и со многу други предизвици, и, како што рече, ќе има капацитет да се справи и со сегашнава политичка криза.