Министерот за надворешни работи Никола Попоски, во своето обраќање на самитот „Запирање на сексуалното насилство за време на конфликт: Лондон 2014“, истакна дека Република Македонија има активен пристап во имплементацијата на Резолуцијата на ОН 1325, која се однесува на важноста на учеството на жените во превенција и разрешување конфликти, одржување мир и безбедност.
Попоски, како што соопшти МНР, нагласи дека образованието и активната вклученост на жените се клучни за создавање на стабилни и продуктивни општества.
На маргините на Самитот, министерот Попоски оствари неформални средби со државниот секретар за надворешни работи на Обединетото Кралство, Вилијам Хејг и министерот за Европа, Дејвид Лидингтон.
На средбите беа разменети мислења за билатералните односи, како и за евроатланските перспективи на Република Македонија. Во оваа прилика Попоски ја потврдил определноста на граѓаните и Владата на Република Македонија за членството во ЕУ и НАТО. На средбите беше реафирмирана поддршката на Владата на Обединетото Кралство кон европските перспективи на земјата.