Врнежите од дожд и топењето на снегот предизвикаа поплави во Битолско, Прилепско, преспанскиот регион и Демир Хисар.
Според информации од Центарот за управување со кризи во утринските часови се излеа Голема Река кај селата Горна и Долна Бела Црква и Езерани во Ресенско при што поплави земјоделско земјиште, неколку куќи и плевни.
Поплавени се и околу 800 до 1000 хектари земјоделска површина во Битолско и Прилепско. На Црна Рекаод дождот е зголемен водостојот за 108 сантиметри кај Новаци. Поплавени се површини во атарите на Лознани, Вашарејца, Ношпал, Могила во Битолско и во Тополчани во општина Прилеп.
Поплавен е и коловозот од Могила до Радобор поради што е затворен и за сообраќај.
Црна Река е излеана и во општина Демир Хисар кај мостот за селото Бабино поради паднати дрвја во речното корито.