Тетовската полиција му поднесе пријава на сопственикот на угостителски објект во тетовското село Жеровјане, откако при контрола во објектот биле затекнати „12 ангажирани лица“, како и гости, кои ги кршеле важечките прописи за заштита против коронавирусот.
„СВР Тетово поднесе кривична пријава против правно лице – угостителски објект од с.Жеровјане, општина Боговиње и против А.А.(31) од с.Боговиње, одговорно лице во угостителскиот објект, поради постоење основи на сомнение за сторено кривично дело „непостапување според здравствените прописи за време на епидемија“. На 25.06.2021, полициски службеници извршиле контрола во објектот и било констатирано дека работи во затворени простории и во внатрешноста биле затекнати гости и 12 лица ангажирани во објектот, со што постапиле спротивно на одлуката на Владата со која се дозволува работа само на отворените делови-терасите на угостителските објекти“, се вели во полициското соопштение.