Полицаецот кој ја споделил фотографијата на која е и негов колега, двајцата облечени во полициска униформа, заработи суспензија од работа, а за двајцата се води дисциплинска постапка, дознава „А1он“. Суспензијата е една од најстрогите мерки кои може да ги изрече МВР за вработените, откако ќе утврди одговорност дека направиле прекршување на законите, внатрешните правилници и кодекси.
Дисциплинската постапка се води за да се утврди одговорност, а освен суспензијата за еден од полицајците, за двајцата ќе биде изречена и дополнителна казна која може да биде парична, преместување на пониско работно место според хиерархијата на МВР или отказ.
Техничката заменик-министерка Славјанка Петровска, однесувањето на полицајците го оцени како недозволиво.
„Вакво недолично однесување е недозволиво за припадници на полицијата кои во услови на вонредна состојба ја имаат одговорноста да ја гарантираат сигурноста на граѓаните и да влеат доверба. Строги казни за вакви сериозни дисциплински престапи“, порача Петровска.
Министерството за внатрешни работи, пак, веднаш реагираше и го осуди однесувањето на полицајците.
Двајцата полицајци на социјалните мрежи споделија фотографија како седат во автомобил со полициска униформа и напишаа „Седете дома клошари“, што наиде на силни критики и барања за санкционирање од страна на јавноста.