Две лица облечени во полициска униформа се фотографирале, а потоа на објавата споделена на социјалните мрежи пишале „Седете дома клошари“. Друг лице, пак, фотографиран пред огледало пишал „Единицата формирана, ако ве зачекам после 9, пендрек и 10 години робија… казна нема“. Сите фотографии споделени по социјални мрежи наидоа на жестоки реакции од граѓаните поради пораките кои се испишани на нив.
Од Министерството за внатрешни работи велат дека го проверуваат случајот, по што ќе информираат дали станува збор за вработени кај нив. Но, оттаму велат дека и да станува збор за граѓани кои се фотографирале во полициска униформа, следуваат санкции.
Сепак, „А1он“ од извори во министерството дознава дека идентификуван е еден од трите лица кој е полицаец, а тој пак, ќе треба да посочи кое е лицето со него на сликата, за потоа да се утврди во која единица при МВР работат. За нив следува санкција од Одделот за внатрешна контрола.
Со ваквата постапка, доколку станува збор за полицајци, тие го прекршиле Кодексот на полициската етика, кој се должни да го почитуваат.
Нивните фотографии кои биле објавени на личните профили на социјалните мрежи, сега се споделуваат по приватни профили каде се осудува нивната постапка.