Секторот за внатрешни работи Скопје денеска поднесе кривични пријави против девет лица за инцидентите во Собранието од 27. април.
Кривичните пријави се за сторено насилство кон луѓе и оштетување на имот, а направени се три кривични дела: „учество во толпа што ќе спречи службено лице во вршење на службено дејствие“, потоа „напад врз службено лице при вршење работи на безбедноста“ и „учество во толпа што ќе изврши кривично дело“, предвидени и казниви по член 384, 383 и 385 од КЗ.
Кривично пријавени се: З.Т. (51), Г.Ц. (49), В.П. (21) тројцата од Скопје и Д.М. (29) и В.М. (46) двајцата од Кочани заради сомнение за сторено кривично дело – „учество во толпа што ќе спречи службено лице во вршење на службено дејствие“. Потоа, Н.П. (38) и П.М. (22) од Скопје и С.П. (21) од Кичево заради сомнение за сторено кривично дело – „учество во толпа што ќе изврши кривично дело“; и против А.М. (22) од Скопје којшто се сомничи за сторени три кривични дела – „учество во толпа што ќе спречи службено лице во вршење на службено дејствие“, “напад врз службено лице при вршење работи на безбедноста“ и „учество во толпа што ќе изврши кривично дело“.
Пријавените на 27. април учествувале во инцидентите и откако го пробиле кордонот од полицијата, влегле внатре каде што оштетиле имот во ходникот на Собранието, а потоа физички напднале тројца полициски службениците од внатрешното обезбедување, по што се упатиле кон салата бр. 3, односно прес-центарот каде што физичките ги нападнале пратениците на парламентарното мнозинство.
Секторот за внатрешни работи Скопје во консултација и соработка со Основното јавно обвинителство Скопје и понатаму презема мерки и активности во врска со настаните случени на 27. април во Собранието на Република Македонија и обезбедување на преостанатите кривично пријавени лица, како и на идентификација и документирање и на други лица учесници во настаните.