Пратеничка Јадранка Поцкова од Струмица, која е лекар по професија, е позитивна на коронавирусот и е во домашна изолација, потврди координаторот на пратеничката група на ВМРО-ДПМНЕ во Собранието, Никола Мицевски. Тој не знае како пратеничката се заразила, а за резултатите од тестот го известила викендов. Му кажала дека првите симптоми ги почувствувала пред десетина дена, па затоа решила да не доаѓа во Собранието.
Засега не се знае со кои и со колку лица пратеничката била во контакт и дали одела на партиските протести и била во близина на партиското членство.
„Пратеничката Поцкова е лекар по професија, затоа одговорно постапила. Уште пред десет дена почувствувала дека здравствената состојба и се влошува и решила да не доаѓа на работа. Тестот за Ковид-19 го направила минатата недела, а на крајот на викендот го добила и позитивниот резултат, за жал. Го известила собранискиот спикер , а со мене и со колегите е во секојдневна онлајн комуникација. Со оглед на фактот што не доаѓаше во Собранието, мислам дека не постои опасност вирусот да го пренела меѓу пратениците“, вели Мицевски.
Пред Поцкова, пратениците на СДСМ и ДУИ, Лазе Танески и Исмаил Јахоски се заразија со коронавирусот. Непосредено пред формирањето на новиот собраниски состав, болеста ја прележаа и претедателот на Собранието Талат Џафери и пратеникот на ДУИ Арбен Зибери.
