Започнаа археолошките истражувања во Љубанишко поле во чија околина треба да се гради помпезно најавуваниот хотелско туристички комплекс на Индиецот Субарата Рој.
Пет археолози до крајот на оваа година треба да утврдат што точно се крие на овој локалитет за кој се знае дека има средновековни градби кои некогаш биле евидентирани и лоцирани на просторот но досега не биле истражени. Станува збор за двата локалитети, Раица Манастириште и црквата Света Богородица.
„После добиеното одобрение и дозвола од страна на Управата за заштита на културното наследство и потребните средства од Министерството за култура ние започнавме со неопходните археолошки истражувања. Истражувањата ќе траат се додека целосно не се истражи просторот. Очекуваме тоа да се случи до крајот на оваа календарска година. Ќе гледаме што повеќе да истражиме со парите кои го добивме, односно да ги одредиме границите на археолошките локалитети и видот на археолошките локалитети за да можеме да изработиме заштитно конзерваторски основи со што локалитетите ќе бидат заштитени и презентирани, рече за А1, Тања Паскали Бунташеска директор на Завод и музеј Охрид.
Бунташеска вели дека немаат никакви реакции од страна на надлежните државни институции во врска со нивните активности на просторот во чија што околина треба да никне и туристичкиот комплекс
.
„Идејата за археолошки истражувања беше поткрената од надлежните институции и тоа беше во договор со нив. Немаше никаква реакција за забрана за изведување на тие ископувања. Се работи за локалитети кои се претходно евидентирани и ние знаеме од претходно дека тие постојат како такви. На заеднички состанок со Министерство за култутра и Министерство за транспорт и врски е одлучено да се доделат средства за вршење на тие археолошки истражувања. Целата постапка ќе оди легално и по барање на министерствата и никој не се спротистави на таквата одлука“ рече Бунташевска.
Мики Трајковски