На 53-годишна возраст денеска ненадејно почина Љупчо Митревски, научен советник во Институтот за македонски јазик „Крсте Мисирков“ во Скопје.
По повод неговата смрт утре во 10 часот и 30 минути ќе биде одржана комеморативна седница во Институтот за македонски јазик.
Митревски од 1988 до 2009 година работел во Институтот за старословенска култура во Прилеп, а потоа во Институтот за за македонски јазик „Крсте Мисирков“.
Бил соработник на повеќе проекти: Писмени споменици за средновековната култура на Македонија, Универзален словенски речник, (Торонто, Канада), Речник на црковнословенскиот јазик од македонска редакција и др. Бил автор и коавтор на повеќе критички изданија на македонски средновековни ракописи, преведувач и лектор по македонски јазик во Брно, Чешка Република (2004−2009).
Член бил на Комисијата за лекторски испит при Министерството за култура.
Митревски учествувал на повеќе научни конференции, на специјалистички, стручни и јазични школи. За својата научна дејност добитник е на повеќе признанија меѓу кои и на наградата „Гоце Делчев“ во 1996 година.