Вчера во вечерните часови на Клиниката за детски болести почина 13-месечно бебе од тетовскиот регион, соопштија од Министерството за здравство.
Оттаму посочуваат дека бебето починало поради компликации предизвикани од морбили или мали сипаници. Како што соопштија од МЗ бебето претходно не било вакцинирано. Ова е трет случај на починато дете од морбили за само три дена.
„Министерството за здравство изразува жалење за смртта на детето, како резултат на компликации од морбили, болест која може да се спречи со вакцинација.
Уште еднаш апелираме до сите родители, најодговорно да ги сфатат препораките за вакцинирање со МРП вакцината, која заштитува од ова сериозно заразно заболување. Вакцината во здравствените домови се аплицира бесплатно, а вакцините се со проверен квалитет“, се посочува во соопштението на министерството.
