По силниот земјотрес во Скопје во попладневните часови на 11.09.2016 год. македонските радиоаматери воспоставија радиомрежа за опасност на кусобрановото фреквенциско подрачје од 3,7 MHz, како и на ултракуси бранови на 144 МHz. Мрежата беше воспоставена превентивно, како и заради проверка и увежбување на спремноста на радиоаметрите да делуваат во вонредни околности.
Досега повеќе пати се докажало дека кога останатите комуникациски системи откажуваат, радиоаматерските комуникации и натаму се во функција и неретко се единствен начин за врска со надворешниот свет.
Радиоаматерските комуникации и во најтешки услови не можат да бидат целосно прекинати, а тоа се должи на големата дисперзираност на радиоаматерските станици, нивната системска независност од земска инфраструктура, големата флексибилност за функционирање во импровизирани услови и секако секогаш присутната спремност на радиоаматерите да помогнат на својата заедница во најтешките моменти.
Примерите за тоа се бројни. Македонските радиоаматерите први во светот ја пренеле веста за катастрофалниот скопски земјотрес во 1963 година, со што овозможиле што поскоро да пристигне неопходната помош.
Во 2016 год. во Македонија се регистрирани 500 лиценцирани радиоаматерски оператори.