По секој инцидент скопјани бараат враќање на маалските полицајци, од МВР само ветувања

Од:

Без разлика дали се работи за демолирање детско игралиште ули убиство на малолетник, како она во Ново Лисиче, скопјани од различни делови на градот со години бараат да се вратат полицајците позорникари, но од МВР добиваат само ветувања. Иако враќањето на маалските полицајци е во програмата за работа на Владата, за позорникарска служба од МВР велат дека скопјани ќе треба уште да почекаат, но на проектот интензивно се работело.

„Од доаѓањето на актуелното раководство на МВР во 2017 година, интензивно го спроведуваме проектот за враќање на маалскиот полицаец, односно позорникар и тој се имплементира во голем број градови, а резултатите се видливи преку намалувањето на криминалитетот, што јасно го покажуваат статистиките, но и со зголемувањето на довербата на граѓаните во полицијата, што се манифестира преку направените анкети. Проектот се имплементира и во помали делови од Скопје, а сега, со почнувањето на работа на новите полициски службеници кои оваа година ја завршија обуката, од кои најголем дел се токму за подрачјето на СВР Скопје, тој проект ќе се прошири дополнително“, велат од МВР за „А1он“.

Од таму не кажуваат конкретно во кои градови изминативе две години веќе се вратени позорникарите, но според досегашните објави на Министерството, маалски полицајци, како што популарно ги нарекоа позорникарите, има во Куманово, Битола, Штип и Тетово.

Изминатиот викенд скопјани ги обновија барањата за враќање на позорникарите откако среде ноќ во саботата две момчиња искршија детско игралиште во близина на Владата. Галамата ги разбудила станарите од околните згради кои се обиделе да ги предупредат момчињата кои дивееле на игралиштето, но добиле низа закани и пцости. И во август годинава, откако почина 17-годишно момче кое беше прободено со нож во Паркот на музиката во Ново Лисиче, скопјани побараа МВР да ги врати позорникарите.

Две недели по убиството на момчето беа промовирани 528 нови полицајци. Од МВР сега објаснуваат дека дел од нив ќе бидат маалски полицајци во Скопје. Министерот Оливер Спасовски лани објасни дека за враќање на позорникарите само на Скопје му требаат 300 нови полицајци.

Ветувањето за враќање на маалските полицајци во ек на изборната кампања во 2016 година го даде токму Спасовски, кој тогаш беше технички министер во МВР.

 

Би можело да ве интересира

Извршени контроли во 2.184 угостителски објекти, 24 не ги почитувале мерките

Ана Ололовска

За четири дена 19 починати, 187 новозаразени и 1136 лица во изолација поради коронавирусот

Маја Илиевска-Пачемска

Премиерот Спасовски негативен на Ковид-19, тој останува во домашна изолација

А1он

Македонскиот полициски синдикат бара да престанат политичките борби во МВР

Ана Ололовска

Со полициска асистенција ќе се земаат анкети од семејството на починатиот од Ковид-19 на чиј погреб присуствуваа 200 луѓе

А1он

Чулев: Кривична за скопјанец кој на фејсбук ширел говор на омраза кон Ромите

Ана Ололовска