Лаборантот на Детска клиника се заразил со коронавирус од мајка на пациент, која лежела во болницата, а позитивна на коронавирус е и медицинска сестра од имунолошкото одделение.
Министерот за здравство Венко Филипче најави дека се подготвува поголемо тестирање за коронавирус на Детската клиника.
„На Детската клиника има и сестра заболена кај која е дијагностициран вирусот и точно е дека станува збор за вирус донесен од надвор. Разговараме за поголемо скринирање, посебно на имунологија, за сите што се сместени таму како и персоналот. Заболената сестра е од имунолошкото одделение“, рече министерот Филипче.
Коронавирус кај лаборантот на Детска клинка беше дијагностициран во вторникот кога четворица вработени во лабораторијата беа ставени во изолација.
Вработени на Клиниката за „А1он“ во вторникот изјавија дека се сомневаат дека коронавирусот во болницата го донела придружба на пациент, но министерот официјално ја потврди информацијата денес.
На Детската клиника засега нема реорганизација поради потврдените случаи на коронавирус кај вработените.