По десет часа распит полицијата утрово го ослободи 23-годишниот Никола Наумовски приведен вчера поради поврзаност со дојавите за бомбите во училиштата во Скопје. Од МВР велат дека направиле и претрес во неговиот дом.
„Со лицето е извршен службен разговор, во координација со јавното обвинителство извршен е претрес во дом, одземени се предмети за вештачење и се преземаат мерки за расчистување на случајот“, соопшти МВР.
Приведениот Никола Наумовски е член и активист на платформата „Конзерватива.мк“ кои синоќа на Фејсбук објавија дека тој не е поврзан со дојавите за бомби во училиштата.
„Неспособноста на МВР и властите резултираше кон приведување на невини лица! Одговорно тврдиме и демантираме дека нашиот член Никола има каква било поврзаност со овие настани“, објави „Конзерватива.мк“.
Вчера лажни дојави за бомби имаше во девет скопски училишта, а минатата недела три последователни дена исто така девет училишта добиваа мејлови на електронските адреси со дојави за бомби.