Пратеникот на ВМРО-ДПМНЕ, Бране Петрушевски, обвини дека претседателот на УПОЗ, Трпе Деаноски, потрошил над 60.000 евра од синдикални членарини за организирање спортски игри во Црна Гора.
Според Петрушевски, Деаноски, кој е дел и од раководството на ССМ, организирал четиридневни спортски игри во туристичкото место Чањ, наместо тие да се одржат во некој од домашните туристички центри.
„Додека во Македонија зборува дека платите се мали и дека граѓаните живеат во сиромаштија, Трпе Деаноски во Црна Гора се луксузира на трошок на синдикалците“, рече Петрушевски.
Тој додаде дека парите за настанот биле обезбедени од членарините што ги плаќаат вработените и оцени дека синдикалните претставници „пред камерите глумат загрижени борци за поголеми плати, а зад камерите се луксузираат“.
Петрушевски посочи дека спортските игри на УПОЗ претходно се организирале во Македонија, но овојпат бил избран туристичкиот центар Чањ во Црна Гора.