Поранешната министерка за одбрана и претседавачка на Централниот одбор на СДСМ, Славјанка Петровска, преку објава на социјалните мрежи се осврна на реакциите по нејзиното учество во иницијативата „Разговорите за Македонија“, нагласувајќи дека нејзиниот ангажман не е насочен против партијата, туку, како што вели, „за СДСМ“.
Петровска наведува дека е член на СДСМ од 2000 година и потсетува на својот повеќедецениски политички ангажман, истакнувајќи дека останала во партијата и во периодите кога таа бележела изборни порази и политички кризи.
„Бев, сум и ќе бидам СДСМ“, пишува Петровска, додавајќи дека активно учествувала во сите клучни политички процеси на партијата, од изборните кампањи, протестите и објавувањето на „Вистината за Македонија“, до периодот на владеење и спроведувањето на важни политички одлуки.
Таа потсетува дека првата партиска функција ја добила во 2024 година како претседавач на Централниот одбор на СДСМ, а претходно била дополнителен заменик-министер за внатрешни работи, пратеничка и министерка за одбрана.
Во објавата Петровска се осврнува и на својата кандидатура за претседател на СДСМ во 2024 година, кога, како што наведува, понудила програма наречена „Манифест за социјалдемократијата“, но се повлекла поради, како што тврди, кршење на принципите и правилата во изборниот процес.
Таа вели дека на партиските органи предложила ветинг на пратениците и раководството, како и измени на Статутот со цел поголема моќ на членството во одлучувањето, но дека за тие иницијативи не добила одговор.
„Моето учество во Разговорите за Македонија не е против СДСМ, туку за СДСМ. Затоа што јас сум социјалдемократ и по убедување и по дејствување“, наведува Петровска.
Објавата ја завршува со цитат од Еленор Рузвелт: „Големите умови дискутираат за идеи; просечните умови разговараат за настани; малите умови разговараат за луѓето.“