Во две сообраќајни незгоди што се случиле вчера во Прилеп и во Кавадарци, еден пешак загинал, а еден е тешко повреден, информираат од МВР.
Непознато лице вчера во 20:30 часот ул. „Трајко Николоски“ во Прилеп управувајќи патничко возило непозната марка и непознати регистарски ознаки, удрило во пешакот прилепчанецот М.Ј. (39) и го напуштило местото на настанот.
Од лекар од Итна медицинска помош-Прилеп била констатирана смрт кај пешакот М.Ј. Увид на местото на настанот извршиле јавен обвинител и екипа од Полициска станица Прилеп. По наредба на јавен обвинител, телото на починатиот било предадено на обдукација.
Се преземаат мерки за пронаоѓање на возилото и возачот и за целосно расчистување на случајот.
Во сообраќајната несреќа што се случила вчера во 14:05 часот на ул. „Страшо Пинџур“ во Кавадарци кавадарчанецот Н.М. (30) управувајќи патничко возило „Мерцедес“ со кавадаречки регистарски ознаки, движејќи се наназад удрил во пешакот Т.Д. (75) од Прилеп.
Во незгодата Т.Д. се здобила со тешки телесни повреди и по укажаната лекарска помош во Општа болница Кавадарци била пренесена во Ургентен центар Скопје.