Асфалтирање на сите улици во Неготино и населените места заради побезбеден и регулиран сообраќај, како во градот, така и во сите населени места, вети денеска кандидатот за градоначалник на Неготино од редовите на ВМРО-ДПМНЕ, Златко Пенков.
– Во селото Тремник приоритет е асфалтирање на главната улица, додека во селото Војшанци асфалтирање на пристапната улица кон населеното место, посочи Пенков на прес-конференција.
Тој нагласи дека еден од значајните приоритети ќе биде и поставувањето фекална канализација за селата Црвени Брегови и Дуброво.
– Следен приоритет е уредување на централното подрачје во селата Криволак, Тремник и Курија со асфалтирање и поставување на урбана опрема и паркови во овие населени места, рече Пенков, додавајќи дека во целост ќе ја реализира изборната програма.