„Завчера околу полноќ, дополнителниот заменик министер за труд и социјална политика Диме Спасов предизвика неколку сообраќајни несреќи. Неговото несовесно забавување завршило токму на оваа улица.
И да се разбереме – ние не сме денес тука затоа што Диме Спасов се забавувал. Ние сме денес тука, бидејќи тој постапил на начин кој не му доликува на кое било пристојно човечко суштество, а уште помалку на висок државен функционер.
Во текот на вчерашниот ден, повторно ја видовме пропагандата и криминалот на ДПМНЕ на дело. Повторно видовме изигрување на правдата.
Прво, влегол во возило кога не смеел да влезе и искршил се што му се нашло на патот. Второ, избегал од полицијата и од местото на настанот. Оставајќи ги зад себе другите учесници во несреќата. Потоа, друго лице дојде да ја лаже полицијата и да се жртвува за да го спаси угледот на младиот заменик министер, кажувајќи дека тој управувал со возилото.
Повеќе од дваесет часа подоцна, неговите адвокати и пропагандната машинерија на дпмне ја смислија најновата лага – дека Диме Спасов бил нападнат од „осудени криминалци со албанско етничко потекло кои имале дебели полициски досиеа“, па тој едноставно морал да бега и да крши се пред себе. Исто така, полицајците кои конечно го запреле по неговото десетминутно дивеење по скопските улици, му се виделе сомнителни, па морал да избега и од нив.
Повторно лаги, бегање од одговорност и закани за тужење на медиуми кои си ја вршат својата работа.
Диме Спасов мора да одговара за своите постапки. И лицата кои му помогнале да го прикрие делото мора да одговараат. Нашиот систем не смее да продолжи да толерира прекршување на законите од тие кои треба да ги спроведуваат. Бараме и очекуваме Диме Спасов да поднесе оставка од својата функција. Веднаш“, изјави граѓанскиот активист Павле Богоевски.