Патниците кои во земјава доаѓаат од Северна Италија ќе се пропуштаат на пет гранични премини – Богородица, Блаце, Деве Баир, Ќафасан и Табановце за да биде посконцентрирана контролата и да има време да се организираат здравствените работници, рече министерот за здравство Венко Филипче, по состанокот на Управувачкиот комитет на Центарот за управување со кризи, а во врска со заканите од коронавирусот.
Министерот најави и засилена контрола на аеродромите во Скопје и во Охрид.
Во меѓувреме, формиран Кризен штаб во Министерството за здрaвство кој секој ден ќе информира за состојбата со коронавирусот, а обезбедени се и простории во Инфективните одделенија во болниците во Штип, Велес и Гостивар кои ќе бидат обезбедувани од претставници од МВР.
Тој го повтори апелот граѓаните ако немаат итна потреба, да не патуваат во Северна Италија.
„Утре на седница на Владата ќе се дискутира да се одложат сите организирани посети во овој регион од страна на државните институции“, рече Филипче.
Toj информира и дека тестовите на тројцата Кинези кои денеска пристигнаа во земјава се негативни, но за секој случај, тие иако веќе биле во 14 дневен карантин, ќе останат во изолација уште две недели под мониторинг на македонските здравствени власти.