Кандидатот за градоначалник на Кавадарци од коалицијата „За подобра Македонија“, предводена од ВМРО – ДПМНЕ, Александар Панов денеска во рамки на предизборните активности се сретна со вработените во Домот на културата „Иван Мазов Климе” и го посети село Ваташа.
– Изградивме термофасада на детската градинка во селото Ваташа каде се вложени значителни средства за изолација и нова фасада. Целта е постигнување на енергетска ефикасност. Во овој објект е изградена и модерна кујна од каде со храна се снабдуваат сите 4 клона на градинката „Рада Поцева”. Наскоро ќе биде пуштена во работа и нова градинка во селото. Заради енергетска ефикасност нова термофасада поставивме и во основното општинско училиште „Димката Ангелов Габерот” во ова село. Тука го сменивме и покривот, а изградивме и спортска сала за учениците, рече меѓу другото Панов по посетата на Ваташа.
Во домот на културата “Иван Мазов Климе” со поддршка на градоначалникот на Кавадарци во изминатите 4 години се реализирани неколку проекти за подобрување на условите во културниот дом во кој се оддржани неколку стотини културни настани.