Четиристотини и четириесет пациенти болни од рак на простата, дојка и гастроинтестинален тракт, наместо како досега еднаш месечно, терапијата ќе може да ја подигнуваат со болнички упат квартално односно еднаш за три месеци.
Ова денеска го изјави директорот на Фондот за здравствено осигурување на Македонија, Јован Грповски кој рече дека олеснувањето на начинот на подигнување на терапијата за тие пациенти произлегло на барање
– Контактиравме со Клиниката за радиотерапија и онкологија и за оние дијагнози за кои ова има медицинска оправданост односно каде што навистина пациентот доаѓа да ја подигне терапијата и во тој период не се врши никакво изледување решивме да излеземе во пресрет. Со ова ќе им се намалат трошоците на оние пациенти кои не се од Скопје и наменски доаѓаа до Клиниката само да ја подигнат терапијата, посочи Грповски.
Се работи, нагласи тој, за лековите zoladex, bicalutamide, anastrazol, letrozol, ibandronic и imatinib.
– Она што го менуваме е брахитерапија која е специфичен тип радиотерапија за која досега се бараше специјалистички упат за секоја терапија. Отсега брахитерапијата ќе се дава со еден упат кој го покрива целокупното времетраење на услугата од просечно три седмици, рече Грповски.
Додаде дека и натаму ќе останат посветени на овој тип активности со цел да ги олеснат сите бирократски процедури кои се наметнати и да излезат во пресрет секаде каде нема медицинска индикација дека е потребно нешто друго освен носење упат.