Училиштето во Студена Бара, Кумановско ќе добие нови тоалети. Ова откако четири компании се пријавиле на јавниот повик на Општина Куманово за реконструкција на тоалетите во подрачното училиште „Браќа Миладиновци“. До крајот на неделава ќе биде избрана компанијата која ќе ги реконструира тоалетите кои беа горлив проблем за ова училиште. Предвидената вредност е 311.000 денари
– Во училиштето настава следат четири ученика со физичко присуство од прво до петто одделение, а настава држат двајца наставници. Состојбата со тоалетите е на исклучително ниско ниво. Се надеваме дека наскоро ќе почне реконструкцијата и ќе се реши овој проблем, изјави в.д. директорката на училиштето, Јасминка Спасовска.
Тоалетите на ова училиште се наоѓаат надвор од училишната зграда и не задоволуваат ниту минимум хигиенски стандарди. Во моментов како преодно решение се користат монтажни тоалети.