„Ајде да играме живо, а учиме дигитално“ е „Еразмус плус“ проект во кој е вклучено и ОУ „Страшо Пинџур“ од село Соколарци од општина Чешиново-Облешево, заедно со уште пет европски училишта од Турција, Романија, Бугарија, Полска и Литванија.
Со проектот учениците и наставниците преку разни активности се запознаваат за начини и апликации за користење на модерната технологија во процесот на учење, а во исто време преку забавни, спортски и културни активности и манифестации учат за природата и игрите на отворено и затворено.
– Целта на проектот е зголемување на дигиталните компетенции кај наставниците и учениците преку употреба на „паметна табла“, употреба на платформа со која наставниците ќе можат да се поврзат со партнерските училишта од останатите европски држави и во исто време презентирање на традиционалните игри преку кои ќе можат да се одделат учениците од компјутерите, рече Благој Трајков, директор на ОУ „Страшо Пинџур“ од Соколарци.
Проектот ќе трае две години почнувајки од октомври оваа година а ќе заврши во септември 2019 година.