Учениците во ОУ „Григор Прличев“ денеска наставата ја следеа сосема кратко и по скратена програма. Причината за тоа е исклучувањето од системот за напојување со електрична енергија во текот на вчерашниот ден. И денеска во училиштето немаше струја, а ниту пак се знае кога ќе биде приклучена.
Од најголемата опозициона партија денеска го обвинија директно градоначалникот Бакрачески и го посочија како најодговорен за настанатата ситуација.
Според информациите доставени до нас причина е огромниот долг на училиштето од над 800 илјади денари или повеќе од 13 илјади евра! Ова е последица на неодговорното однесување на Бакрачески и ВМРО-ДПМНЕ. За контрадикторноста да биде поголема, со предвидениот ребаланс на буџетот на општина Охрид Бакрачески и ВМРО-ДПМНЕ ги кратат неопходните средства за комунални и режиски трошоци и тоа за 37% во основните и за 13% во средните училишта. Не само училиштата туку и другите јавни објекти се соочуваат со истиот проблем. Без струја остана и спортската сала Билјанини Извори по втор пат годинава. ВМРО-ДПМНЕ и Никола Бакрачески наместо да ги решаваат проблемите на нас охриѓани тие ни создаваат нови – рече на денешната прес – конференција портпаролот на охридскиот огранок на СДСМ, Александар Кузески.
Градоначалникот Бакрачески ги оцени како неосновани нападите врз него од страна на опозицијата. Тој додаде дека причината за блокирање на сметката на училиштето бил имотно – правен спор од пред 25 години.
Заради имотно – правен спор од 1989 година кога е извршена екпропријација на земјиштето во дворот на ОУ „Григор Прличев“ поведен е судски спор за 420 метри квадратни на име тројца доверители кои што не биле обесштетени и тој спор се одолговлекувал низ правните лавиринти цели 20 години. Врз основа на овој спор, училиштето треба да исплати над 8 милиони денари на доверителите. Во овој момент не се работи за немање средства кои што ние ги добиваме наменски со блок дотациите, меѓутоа блокираната сметка ни оневозможува да се изврши наплата за струјата – рече Бакрачески на денешната прес – конференција.
Бакрачески додаде дека преговарале доверителите да го повлечат извршното судско решение со што би се одблокирала сметката на училиштето. Тој додаде дека раководството на училиштето треба да одлучи дали ќе има настава или не во наредните денови доколку училиштето се уште нема струја.
Постарите професори и наставници во Охрид велат дека не паметат во историјата во некое училиште да не се изведува настава заради неплатен долг за напојување со електрична енергија. Покрај наставата, одложени беа и родителските средби кои требаше да се одржат вчера откако училиштето остана без електрична енергија.
Ф.Ј.