Сообраќајот на ГП „Меџитлија“ е отворен за сите видови возила, додека ГП „Богородица“ е отворен само за патнички моторни возила, информира АМСМ.
Граничните премини беа блокирани денеска од 14 часот по локално време од страна на грчките земјоделци и според најавите блокадите ќе траат до 22 часот.
АМСМ соопшти дека сообраќајот на државните патишта се одвива непречено, по наместа влажни коловози. Намалена видливост поради магла до 50 метри има на планинските превои Ѓавато, Плетвар, Стража и Крушево.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Во сила е законската обврска за задолжително поседување на зимска опрема во возилата.