Притвор за осомничениот за убиството на жената кај Детската клиника побара Основното јавно обвинителство Скопје и издаде наредба за отворање истрага против тоа лице за сторено кривично дело – убиство на бремена жена.
– Основното јавно обвинителство Скопје донесе Наредба за спроведување на истражна постапка против едно лице за сторено кривично дело – Убиство, со квалификаторен облик на убиство на бремена жена.Надлежниот обвинител ги презеде сите почетни мерки за прибирање докази и релевантни факти во насока на расветлување на случајот. При тоа, сослушано е едно лице и дадена е наредба за вршење на обдукција, се вели во соопштението од ОЈО Скопје.
Како што е наведено, досегашните сознанија потврдуваат дека жртвата не е почината од пад од височина.
– Убиството осомничениот го извршил на терасата на кровот на седмиот кат на Детската клиника во Скопје, каде е и најдено безживотното тело на сега починатото лице. Се очекува пристигнувањето на Извештајот од извршената обдукција од страна на Судска медицина, според кој ќе се утврдат и причините за настапување на смртта, се вели во соопштението.
Согласно законските прописи, а сметајќи дека се исполнети условите, јавниот обвинител до судија на предходна постапка, се наведува, поднесе Предлог за определување мерка притвор против осомничениот.