Заменик претседателот на Владата задолжен за европски прашања, Бујар Османи денеска ќе отпатува во работна посета на Берлин, Германија.
Таму се очекува вицепремиерот Османи да оствари средби со Михаил Рот, државен министер за Европа во федералното Министерство за надворешни работи и со Андреас Гис, директор за развојна соработка во Министерството за економска и развојна соработка на Германија.
Реформите поврзани со процесот на европска интеграција на Македонија, особено динамиката на реализацијата на мерките од Планот 3-6-9, како и можностите за германската поддршка за нивна имплементација ќе бидат во фокусот на разговорите, информираа од кабинетот на Османи.
На средбите ќе се разговара и за Берлинскиот процес како и имплементацијата на мерките од Агендата за поврзување кои се особено значајни за понатамошно унапредување на регионалната соработка, како важен сегмент за процесот на пристапување во ЕУ.
Дополнително, во рамки на посетата на Берлин, Османи ќе се сретне и со д-р Кристоф Бејер, потпретседател на Управниот одбор на ГИЗ како и со претставници на Фондацијата Конрад Аденауер и Фондацијата Фридрих Еберт.