Претставници на деветте општини во полошкиот плански регион заеднички ќе работат на создавање функционален механизам за справување и намалување на ризиците од поплави во населените места од тетовско-гостиварското подрачје. Активностите се дел од дводневната работилница во рамките на проектот „Подобрување на отпорноста кон поплави во Полошкиот регион“ што се спроведува од страна на Програмата за развој на Обединетите нации (УНДП) финансиран од швајцарската Агенција за развој и соработка и швајцарскиот Секретаријат за економски прашања.
Според раководителот на оваа програма на УНДП Димитрија Сековски времето и местото на појавата на поплавите и нивниот интензитет не зависат од административните граници на општините што подразбира дека и соодветниот управувачки одговор на локално ниво ги надминува границите на поедините општини.
– Проектот покрај значајни инвестиции ќе обезбеди долгорочна визија и детален план за постепено намалување на ризикот од поплавите преку учество на бројни институции на локално и централно ниво и споделување на ресурсите“ додаде Сековски.
Меѓу целите на овој проект е да се направи темелна промена во начинот на справување со ризикот од поплавите во полошкиот регион што се смета за најранлив во државата во однос на ова прашање. Само во период од неколку години во регионот се случија неколку поплави кои однесоа човечки животи и направија голема материјална штета. Затоа, како што беше истакнато на работилницата, од клучно значење е продлабочувањето на меѓуопштинската соработка зазаштита на населението и материјалните добра од поплавите.
Беа претставени и можните облици на соработка што ги нуди Законот за меѓуопштинска соработка од кои во рамките на работилницата треба да произлезе предлог за најсоодветен облик во согласност со заедничките цели и ресурсите со кои располагаат општините.
Сите општини од овој регион го потврдија својот интерес да учествуваат во воспоставувањето систем на ваков механизам за меѓуопштинска соработка со цел подобро управување со ризиците и справување со кризните состојби преку заеднички инвестиции како и ефикасна и постојана комуникација и координација меѓу засегнатите страни.