Општинските власти во Струмица, во јули решиле 107 проблеми на граѓаните преку сервисот „Систем 48“ од вкупно доставени 120 пријави.
– Останатите 13 пријави се во процес на решавање бидејќи се работи за пријави кои не се решаваат во период од 48 часа, по конкретно се работи за крпење на ударни дупки за кои е потребна тендерска постапка или поставување на нови сливници за кои исто така е потребна фирма изведувач и кроење на дрвја кои во овој временски период екипите задолжени за таа работа, не се во можност да интервенираат – информираат од општината.
Оттаму додаваат дека најголем број од пријавите во месец јули се од областа на собирање смет 46, улично осветлување 38 и 30 од областа на водовод и канализација.
Бројот на доставени пријави во „Систем 48“ значително се зголемува од месец во месец, што е добар показател дека граѓаните на Струмица во овој општински сервис гледаат свој партнер со кого најбрзо ги решаваат проблемите со кои се соочуваат.
