Откако на провладини медиуми се појави лице, Асан Демов, коj се жалеше дека струмичкиот градоначалник Зоран Заев го турнал и не му ја давал социјалната помош од 2.000 денари што му следувала, Општина Струмица остро реагира дека власта злоупотребува граѓани за партиски цели.
„Жално е за приземни политички цели да се злоупотребува кој било граѓанин па и лицето кое денеска пласираше груба лага пред медиумите и јавноста. Повеќе од очигледно е дека платената нарачка за таквата изјава има за цел – дискредитација на името и угледот на градоначалникот Зоран Заев. Ваквите производи од кујната на ВМРО-ДПМНЕ се одамна познати. Така беше и пред последните локални избори со демолирањето на автомобилот на Мојсеј Трајковски, брат на починатиот претседател Борис Трајковски. И тогаш за случајот беше обвинет Зоран Заев и неговите приврзаници за потоа истрагата да покаже дека сторители се млади активисти на ВМРО-ДПМНЕ“, се наведува во реакцијата од општината.
Од Кабинетот на струмичкиот градоначалник посочуваат дека ваквите гнасни сценарија се типични за делувањето на оваа партија и без сомнение ќе продолжат и во наредниот период, затоа што опонентите на Зоран Заев не можат да му се спротивстават со конкретни дела, па во очај посегнуваат по недозволени средства.
„Инаку, Асан Демов им е познат на сите вработени во општинската администрација бидејќи секојдневно пред влезот на Општината бара пари за неговата, наводно, болна сопруга, а градоначалникот Заев повеќе години финансиски го помогнал. За колку пари ова лице ја продал сопствената душа за да ја каже денешната изјава знае само тој и луѓето од ВМРО-ДПМНЕ. Што друго може да се очекува од луѓе кои го изгубиле својот образ“, пишува во соопштението.