Делегацијата на Струмица, успешно ја претстави општината на интернационалниот саем на општините од југоисточна Европа НЕКСПО 2013, кој се одржа во Опатија и Ријека, Република Хрватска. На саемот учествуваа 300 субјекти меѓу кои општини, општински здруженија, развојни агенции, граѓански здруженија и бизнис секторот од Југоисточна Европа. Овој саем ја промовираше улогата на локалните самоуправи во процесот на децентрализација, овозможи регионално вмрежување, промовира регионална соработка и промоција на регионалниот бизнис сектор.
Општина Струмица учествуваше на заеднички штанд со општина Велес, двете општини од Македонија кои го добија сертификатот за поволно бизнис опкружување и уште 6 општини ( Бјеловар, Иванец, Приједор, Сански мост, Пирот и Рума) од Србија, Хрватска и Босна и Херцеговина.
Општина Струмица преку своите претставници успешно се промовираше пред учесниците и посетителите на овој саем, кои имаа можност покрај промотивниот материјал кој беше претставен на штандот и преку разговор со претставниците на општина Струмица, да се информираат за можностите за инвестирање, за напредокот на општината, за видот и бројот на проекти кои општината ги има реализирано, да пронајдат заеднички идеја за понатамошна соработка и да разменат контакти и добри практики. Бидејќи темата на саемот беше ЕУ интеграција и Енергетска ефикасност и обновливи извори на енергија, општина Струмица размени практики со другите општини за проекти кои се веќе реализирани и тековни од предпристапните фондови на ЕУ како и проекти за енергетска ефикасност.
Придобивките на Општина Струмица од овој саем се тоа што општината успеа да ги презентира можностите за инвестирање пред бизнис секторот и странските инвеститори, да покаже дека е општина која постојано ги подобрува и хармонизира бизнис условите и дека ја зацврстува сликата за поволна инвестициона дестинација.
Исто така, во рамките на активностите на саемот, делегацијата од општина Струмица реализираше и средба со Здружението на Македонци во Ријека.