Екипите на ЈП „Стипион“-Штип денеска го рамнеа и тампонираа просторот од улицата до влезот во домот на штипјанецот Петар Милев, кој боледува од ретка болест хемофилија и се движи со помош на помагала и инвалидска количка.
Тој на социјалните мрежи побара oпштина Штип да помогне да се реши неговиот проблем со пристапот до неговиот дом.
– Секое утро излегувам со количката и ми треба тој простор за да можам да се движам од улицата до домот. Малку е незгоден теренот, имаше од порано бетон, но тој е одамна и беше многу дотраен. Се надевам дека сега пристапот ќе се направи убаво, како што ми е потребно, вели Милев.
Надлежните од Општина Штип велат дека кога го виделе барањето на Милев веднаш излегле на терен за да го решат неговиот инфраструктурен проблем. Забележуваат дека и во иднина ќе излегуваат во пресрет на вакви реални барања доставени од страна на граѓаните, со цел да имаат полесен пристап до улиците и тротоарните површини.