Протестите на сопствениците на времени објекти во Охрид нема да ги предомислат општинските власти да ги спроведат најавените активности за воведување ред кога станува збор за нивното поставување и функционирање.
Како што се истакнува во соопштението од локалната самоуправа, на подрачјето на Охрид од 2006 година до денеска не бил склучен договор меѓу општината и сопствениците на времените објекти за поставување на истите.
– За сите овие осум години времените објекти поставени на територијата на општина Охрид законски гледано се нелегални и тие мора да бидат отстранети. За целиот овој период нивните сопственици не уплаќале никакви средства на локалната самоуправа бидејќи и немале законски основ да го сторат тоа. Дел од оние кои поставиле времени објекти користејќи го безредието кое владееше во општинските служби за време на минатата локална власт, склучувале најразлични апсурдни договори, стои во соопштението.
Некои од времените објекти во документите, како што се наведува, фигурирале како информативни пунктови за туристи, а работеле како сендвичари за брза храна.
– Општина Охрид без разлика на критиките кои преку медиумите ги изнесуваат сопствениците на нелегалните објекти нема да се предомисли во намерата еднаш за секогаш да се стави ред и во оваа област, со цел поубав и подобар Охрид, стои во соопштението на локалната самоуправа.
Сопствениците на времени објекти во градот вчера јавно изразија незадоволство затоа што иако во јануари им било ветено дека ќе добијат соодветни информации кои од објектите ќе бидат отстранети, а за кои од нив ќе може да се склучат договори за закуп, тоа досега не се случило.
Станува збор за стотина објекти низ градот, од кои, според самите закупци, егзистенција обезбедуваат над илјада граѓани на Охрид.