Општина Охрид со писмено соопштение реагира на изјавата на пратеникот од СДСМ од Охрид, Томислав Тунтев дека градоначалникот, Никола Бакрачески треба лично да објасни кои се причините за критичниот пад на нивото на Охридското езеро
„Очигледно покрај ОО на СДСМ Охрид и пратениците на СДСМ Охрид добиле специјална задача во пресрет на престојните локални избори да се фокусираат на градоначалникот Никола Бакрачески, а претпоставуваме и зошто.
Го повикуваме пратеникот Томислав Тунтев да ја прочита нашата реакција дадена на ден 31.01.2017 година, по повод претходно даденото соопштение на ОО СДСМ Охрид на истата тема, а воедно да се запознае со содржината на извештаите на надлежните и релевантните институции на Република Македонија како што е УХМР на Р.М.
Уште еднаш напомнуваме дека на секое отстапување од надлежностите и законските регулативи во делот на заштитата на езерските води, жестоко ќе реагираме. Лицемерно и навредливо за граѓаните на Охрид е пратеникот Томислав Тунтев да изразува загриженост за езерото, кога како заменик Градоначалник и координатор на советничкото мнозинство во градскиот совет имаше клучна улога во креирањето и реализацијата на штетните планови за изградба на масивни и робусни станбени комплекси на самиот брег на езерото почнувајќи од хотел Парк преку населбата Лагадин па се до Пештани“ стои во соопштението на Општина Охрид
