„Општина Центар ја прифаќа забелешката од денешното соопштение на Општинскиот комитет на ВМРО-ДПМНЕ, Центар, иако не наведуваат дека фотографиите и текстот за водата на раскопана улица се однесуваат само за Маџир Маало. Потсетуваме дека се работи за улицата „Ѓуро Ѓоновиќ“ за која има поделена надлежност меѓу општина Центар и општина Аеродром.
Претходниот градоначалник на Аеродром Ивица Коневски, кадар на ВМРО-ДПМНЕ, и покрај многуте барања и укажувања не ја даваше согласноста да почне комплетната реконструкција на улицата. Поради намерното кочење од ВМРО-ДПМНЕ, улицата во Маџир Маало е во оваа состојба.
По смената на власта, добиена е согласноста од општина Аеродром и завршени се сите подготовки за да почне реконструкцијата.
Во понеделник градоначалникот Саша Богдановиќ, на прес конференција ќе ги објави деталите и плановите за улицата „Ѓуро Ѓоновиќ“ која по 50 години ќе добие нова канализациона мрежа, асфалт и тротоари“ се вели во соопштението на Општина Центар.