Околу седумдесет пожари се регистрирани во првата половина од годината во Тиквешијата, информираа командантите на територијалните противпожарни единици од Кавадарци и Неготино, Илчо Богевски и Иле Илиев.
Во кавадаречката противпожарна служба евидентирани се 50 интервенции на пожарникарите во општините Кавадарци и Росоман.
– Четириесет од пожарите избувнаа во затворен, а пет на отворен простор. Имавме и пет интервенции при сообраќајни несреќи. Споредено со лани, засега бележиме намалување на шумските пожари, а зголемување на оние во градот и интервенциите при сообраќајки, рече Богевски.
Во единицата во Неготино имало 21 интервенција.
– Во Неготинско и Демиркаписко пожар избувна во 9 објекти, пламени јазици се појавија во 8 случаи на отворен простор и двапати во контејнери за отпад. Интервениравме и при две сообраќајни незгоди, рече Илиев.